आज र भोली देशका केही ठाउँमा ठूलो वर्षाको सम्भावना, सचेत रहन मौसमविद्को आग्रह

काठमाण्डौ, साउन ४ । देशभरको मौसम आज दिनभरजसो बदली हुने भएको छ ।
लुम्बिनी प्रदेशका केही ठाउँमा गएरातिदेखि पानी परिरहेको छ भने केही ठाउँमा ठूलो वर्षा भएको छ । आज दिउँसो सुदूरपश्चिम, लुम्बिनी, गण्डकी, वाग्मती र मधेस प्रदेशका केही ठाउँमा ठूलो वर्षा हुने मौसम पूर्वानुमान महाशाखाको अनुमान छ ।
अन्य धेरै क्षेत्रमा हल्कादेखि मध्यम वर्षा हुने अनुमान गरिएको छ । यस्तै, राति पनि वाग्मती, गण्डकी, लुम्बिनी र सुदूरपश्चिम प्रदेशका केही ठाउँमा ठूलो पानी पर्ने अनुमान छ । भोलिको मौसम पनि यस्तै रहने भएकाले सचेत रहन मौसमविद्ले आग्रह गरेका छन् ।