देउवाको उम्मेदवारी विरुद्ध उजुरी, निर्वाचन आयोगले भोलिसम्ममा निर्णय गर्ने

असोज, २४ । प्रधानमन्त्री तथा नेपाली कांग्रेसका सभापति शेरबहादुर देउवाको उम्मेदवारी विरुद्ध उजुरी परेको छ । मतदाता नामावलीमा र नागरिकतामा देउवाको जन्ममिति फरक रहेको भन्दै निर्वाचन आयोगमा उजुरी परेको हो ।
जन्ममिति फरक परेको भन्दै देउवाका प्रतिस्पर्धी कर्ण मल्लले निर्वाचन आयोगमा उजुरी दिएका हुन् । उजुरीमा उनले देउवाको उम्मेदवारी खारेजीको माग गरेका छन् ।
डडेलधुराबाट प्रतिनिधि सभा सदस्यमा उम्मेदवारी दिएका देउवाको नागरिकतामा जन्ममिति ३१ जेठ २००३ छ भने मतदाता नामावलीमा जन्म मिति ३१ जेठ २००२ लेखिएको छ ।
देउवा विरुद्ध परेको उजुरीमाथि भोलिसम्म निर्णय हुने निर्वाचन आयोगले जनाएको छ ।