आफु अध्ययन गरेको विद्यालयद्वारा सांसद सुबोध सम्मानित

माघ, २३ । प्रतिनिधिसभा सांसद माधव सापकोटा सुबोधलाई सिन्धुपाल्चोकको चौतारासँगाचोकगढी नगरपालिका स्थित सेतीदेवि पञ्चकन्या माध्यमिक विद्यालयले सम्मान गरेको छ ।

सोमबार ४६ औँ वार्षिकउत्सव, अभिभावक भेला तथा भूतपूर्व विद्यार्थी पुनर्मिलन कार्यक्रमका अवसरमा विद्यालयले सांसद सुबोधलाई सम्मान गरेको हो । निवर्तमान सभामुख अग्निप्रसाद सापकोटाले दोसल्ला ओढाएर सांसद सुबोधलाई सम्मानपत्र प्रदान गरे ।
सम्मान पत्रमा सांसद सुबोधले पाएको सफलतामा विद्यालयले गर्व गरेको उल्लेख गरिएको छ भने थप सफलताको शुभकामना व्यक्त गरिएको छ । सांसद सुवोध यस विद्यालयका भूतपूर्व विद्यार्थी हुन् । उनले यही विद्यालयबाट आफ्नो अध्ययन सुरु गरेका थिए भने आफ्नो राजनीतिलाई पनि अघि बढाएका थिए ।

सम्मान ग्रहण गर्दै सांसद सुबोधले आफु कखरा सिकेको विद्यालयले सम्मान गर्दा गर्वको अनुभुती भएको बताउँदै विद्यालयको चौतर्फि विकासमा आफुले ध्यान दिने प्रतिवद्धता जनाए ।