बलेफी हाइड्रोपावरको नाममा अख्तियारमा उजुरी, राजस्व छलीको आशंका

काठमाडौँ —सिन्धुपाल्चोकस्थित जुगल गाउँपालिका–२ नम्बर वडा क्षेत्र भित्र निर्माण गरिएको बलेफी हाइड्रोपावर आयोजनामा अनियमितता भएको आशंका जनाउँदै जुगल गाउँपालिकाले अख्तियार दुरुपयोग अनुसन्धान आयोग, टंगालमा उजुरी दिएको छ ।

२०७९ सालमा जुगल गाउँपालिका वडा नम्बर २ मा बलेफी हाइड्रोपावर (३६ मेगावाट) नामक कम्पनीमार्फत निर्माण सम्पन्न गरिएको आयोजनामा स्थानीय स्रोतको प्रयोग, सरोकारवाला निकायको स्वीकृति तथा अनुमति नलिइकन निर्माण कार्य गरिएको जनाइएको छ । गाउँपालिकाको अनुसार आयोजनाको निर्माण प्रक्रिया तथा सञ्चालनमा नियमन र समन्वय अभाव देखिएको छ । स्थानीय श्रोत साधन (ढुंगा गिटी बालुवा) उपयोग गरेको तर गाउँपालिका कार्याविधि २०८० को दफा १२ बमोजिम सुचिकृत हुन नआएको गाउँपालिकाको दावी छ । साथै हालसम्म राजस्व तिरेको भए त्यसको रसिद प्रमाण र कागजात गाउँपालिकामा बुझाउन पटक पटक अनुरोध गरेको तर अटेरी गरेको हुँदा राजस्व छली भएको गम्भीर शंका पैदा भएको गाउँपालिकाको उजुरीमा उल्लेख छ ।

गाउँपालिकाले यसबारे थप छानबिनका लागि अख्तियारलाई पत्र पठाउँदै उच्चस्तरीय अनुसन्धान गर्न अनुरोध गरेको छ । गाउँपालिकाको २०८२ असार ८ गते बसेको गाउँ कार्य पालिकाको बैठकको निर्णयका आधारमा पत्राचार गरिएको अध्यक्ष रेशम स्याङबोले जानकारी दिएका छन् । जुगल गाउँपालिकाका अध्यक्ष रेशम स्याङ्बोद्धारा हस्ताक्षरित उक्त पत्रमा आयोजनाको वैधानिक प्रक्रिया, पर्यावरणीय प्रभाव मूल्यांकन र स्थानीय सरोकारवालाको सहभागिता नहुँदा स्थानीयस्तरमा समस्या सिर्जना भएको जनाइएको छ ।