दाङको तुलसीपुरमा बसभित्र ७३ वर्षीया वृद्धामाथि सामूहिक बलात्कार

साउन, ५ । दाङको तुलसीपुरमा ७३ वर्षीया वृद्धा महिला बलात्कृत भएकी छिन् । उनलाई बस भित्रै सामूहिक बलात्कार गरेको आरोपमा प्रहरीले दुई युवालाई पक्राउ समेत गरेको छ ।
वृद्ध महिलामाथि बलात्कार गरी रहेकै अवस्थामा तुलसीपुर बसपार्कबाट प्रहरीले तुलसीपुर उपमहानगरपालिका वडा नं १५ का ३० वर्षीय पुष्कर रोका र सल्यानको कुमाख गाउँपालिका – ७ का २० वर्षीय रेशम बिकलाई नियन्त्रणमा लिएको छ। प्युठानको स्वर्गद्वारी नगरपालिका निवासी ७३ बर्सिया ती वृद्धा महिला राति अबेर तुलसीपुर बसपार्क पुगेकी थिइन् ।

आरोपित दुई जनाले सहयोग गर्ने वाहानामा ललाइफकाइ तुलसीपुर – ५ स्थित बसपार्कमा पार्किङ गरी राखिएको ना ४ ख ७८४८ नम्बरको बस लगेका थिए । र उनलाई बसभित्रै पालैपालो बलात्कार गरी रहेकै अवस्थामा प्रहरीले फेला पारेको हो। महिलाको चित्कार सुनेपछि स्थानीयले प्रहरीलाई सूचना दिएका थिए । अहिले घटनाबारे थप अनुसन्धान भइरहेको प्रहरीले जनाएको छ ।