काठमाडौमा अब सुर्तीजन्य पदार्थ बेच्न नपाइने

मंसीर, २७ । काठमाडौमा सुर्तीजन्य पदार्थहरूको बिक्री वितरण गर्न नपाईने भएको छ । काठमाण्डौ महानगरपालिकाले भोलीदेखि सुर्तीजन्य पदार्थहरूको बिक्री वितरणमा पूर्ण रुपमा निषेध गरेको महनागरपालिकाको स्वास्थ्य विभाग प्रमुख रामप्रसाद पौडेलले जानकारी दिए । महानगरपालिकाले १५ दिनअघि एक सूचना प्रकाशित गर्दै प्लास्टिकमा प्याकेजिङ्ग गरिएका खैनी, गुट्खा, पान पराग वा यस्तै प्रकृतिका मुखमा राख्ने रस लिने वा सेवन गर्ने सुर्तीजन्य पदार्थहरूको बिक्री वितरणमा पूर्ण रूपमा प्रतिबन्ध लगाउने घोषणा गरेको थियो । महानगरपालिकाले गरेको सोही निषेधको घोषणा भोलीदेखि पुर्ण रुपमा लागु गरिने पौडेलले जानकारी दिए ।

सुर्ती सेवनको निमित्त बनाइएको वा उत्पादन गरिएको चुरोट, बिडी, सिगार, तमाखु, सुल्फा, प्लास्टिकमा प्याक गरिएका कच्चा सुर्ती, खैनी, गुट्खा, पान पराग वा यस्तै प्रकृतिका मुखमा राख्ने रस लिने सुर्तीजन्य पदार्थको सेवन मानव स्वास्थ्यको लागि अत्यन्त हानिकारक भएको भन्दै सूचनालाई अवज्ञा गरी बिक्री वितरण गरेको पाइए महानगर प्रहरी मार्फत जफत गरी बिक्री वितरण गर्ने व्यवसायीलाई कानुन अनुसार अधिकतम सजाय गरिने चेतावनीसमेत महानगरले दिएको छ ।