सिन्धुपाल्चोक १ बाट नवनिर्वाचित सांसदले भने : मतदातासँग गरेका बाचा पुरा गर्छौँ

मंसीर, ९ । सिन्धुपाल्चोकमा बाम लोकतान्त्रिक गठबन्धनबाट प्रतिनिधिसभा र प्रदेशसभा सदस्यमा नवनिर्वाचित सांसदहरुले मतदातासँग भेटघाट गरेका छन् । सिन्धुपाल्चोक क्षेत्र नम्बर १ बाट प्रतिनिधिसभा सदस्यमा विजयी हुने माधव सापकोटा सुबोध र प्रदेशसभा सदस्यमा विजयी हुने सरल पौडेल सहयात्रीले आज आफ्नो निर्वाचन क्षेत्रमा पर्ने मतदाताहरुसँग भेटघाट गरेका हुन् ।
नवनिर्वाचित सांसदहरुले बनदेउबाट सुकुटे, बलेफि, अधेरी, खाडीचौर, लामोसाँघु हुँदै बाह्रबिसे बजारसम्मका मतदातालाई भेटेका छन् । भेटमा नवनिर्वाचित सांसदहरुले अमूल्य मत दिएर आफुहरुलाई विजयी गराएको भन्दै मतदाताहरुलाई धन्यवाद दिएका छन् ।
मतदातासँगको भेटमा प्रतिनिधिसभा सदस्यमा निर्वाचित सांसद सुबोधले चुनाव हुनुअघि घरदैलो कार्यक्रममा आफुले गरेका बाचा पुरा गर्ने दिन आएको बताए । उनले भने, ‘मलाई विश्वास गरेर जिताउनुभयो, अब म पाँच वर्ष तपाईहरुसँगै रहन्छु, तपाईहरुका समस्या समाधान गर्नुका साथै सिन्धुपाल्चोकको विकास र समृद्धिका लागि देखिने गरि काम गर्नेछु ।’
त्यस्तै, प्रदेशसभा सदस्य सरल सहयात्री पौडेलले सिन्धुपाल्चोकको समृद्धिको लागि नवनिर्वाचित सांसद मिलेर अघि बढ्ने र यसअघि मतदाता समक्ष राखेका बाचा पुरा गर्ने प्रतिबद्धता जनाए । मतदाता भेटघाट तथा धन्यवाद कार्यक्रममा जिल्ला तथा स्थानीय स्तरका नेता तथा कार्यकर्ताहरुको सहभागिता रहेको थियो ।