‘एम अधिकारी’को पहिचान मैले गरेको छु : सांसद गजेन्द्र महत

काठमाण्डौ, साउन १३ । सांसद गजेन्द्र महतले ‘एम अधिकारी’को पहिचान आफुले गरेको जिकिर गरेका छन् ।

प्रतिनिधिसभाको आज बसेको बैठकमा उनले केही समयअघि एम अधिकारी र सीसीटीभी फुटेजबारे निकै सोधखोज भएको तर, कसैले पहिचान गर्न नसकेको बताए । उनले एम अधिकारीबारे कसैले खोजीमा चासो नदेखाएपछि आफूले खोजेको उनको भनाइ छ ।
उनले भने, ‘एम’ भनेको ‘मनी’ र अधिकारी भनेको अधिकार भएको मान्छे भन्ने कुरा मैले पत्ता लगाएको छु, र त्यो भनेको गभर्नर नै हो ।’ आफूले एम अधिकारीबारे लामो अध्ययन र अनुसन्धानपछि यो तथ्य पत्ता लगाएर संसदलाई जानकारी गराएको सांसद महतको भनाइ थियो ।