बोक्सीको घर फिल्ममा दर्शकको क्रेज

वैशाख, १७ । अहिले बोक्सीको घरले नेपाली फिल्मी बजार तात्तिएको छ । महाजात्राको क्रेज नसकिँदै बोक्सीको घरले हलमा दर्शकहरुको घुइँचो छ । बोक्सी नामक सामाजिक अन्धविश्वासको कथालाई टिपेर निर्माण गरिएको यो चलचित्रले निर्मातालाई सोँचे भन्दा बढि सफलता दिलाएको छ । ‘बोक्सीको घर’ नामक चलचित्रले अभिनेतृ केकी अधिकारीको करिअरमा समेत अप्रत्यासित लोकप्रियता कमाइदिएको छ । केकी अधिकारी नै प्रमुख पात्रमा उभिएको यस फिल्मको कथा बस्तुमा उनी असाधारण भिजेकी छिन् ।

नेपाली चलचित्र उद्योगमा एक शालिन, अध्ययनशिल र पढेलेखेकी नायिकाको रुपमा लिइने केकी यो चलचित्रमा बोक्सीको भूमिकामा छिन् । शुक्रबार हलमा लागेको यो फिल्मले सुरुमै उत्कृष्ट ओपनिङ गरेको छ । पहिलो सप्ताहन्त यो सोसल–थ्रीलर ड्रामाले घरेलु बक्स अफिसमा अन्य चलचित्र निर्माताहरुलाई माथ खुवाउने गरि व्यवापार गरेको छ । फिल्मले शुक्रबार र शनिबार देशब्यापी २ करोड १५ लाख रुपैयाँ ग्रस कमाइ गरेको वितरण कम्पनी टिफोकले जनाएको छ । कूल २५० शोजमध्ये डेढसय शो हाउसफूल रहेको उल्लेख छ ।

फिल्मले दुई दिनमै लगानी सुनिश्चित गरेको जनाइएको छ । शनिबार देशभरका हलको अकुपेन्सी ८० देखि शतप्रतिशत देखियो । र हलहरुले समेत अन्य फिल्महरुको सो घटाएर बोक्सीको घरलाई उच्च प्राथमिकतामा राखेको छ । दर्शकको क्रेज देखेर केकी दंग छिन् । यो चलचित्रको निर्माण पनि केकी अधिकारीकै श्रीमान् श्रीमति मिलेर गरिएको हो । अर्थात बोक्सीको घरले केकीको घरमा करोडौँको लक्ष्मी भण्डारण गरिदिँदै छ । शुक्रबार मध्यान्हदेखि फिल्मले पिकअप लिएको थियो । शनिबार काठमाडौं र मोफसल टेरिटोरीका दुबैतर्फको अकुपेन्सी लगभग समानजस्तो देखियो । काठमाडौंसहित पोखरा, नारायणगढ, बुटवल, बिराटनगर, विर्तामोड र इटहरीमा फिल्मको अकुपेन्सी उच्च देखियो । आइतबार पनि उस्तै क्रेज हलहरुमा देखियो ।

ट्रेलर र गीतबाट फिल्मले पाएको हाइपको प्रभाव ओपनिङमा देखिएको अनुमान छ । ‘बोक्सीको घर’ केकीको लिड रोल रहेको र यति आक्रामक ओपनिङ गरेको पहिलो फिल्म हो । बजारीकरणको शैली, कन्टेन्ट प्रवाह र हाइपको मद्दतमा फिल्मले यति बलियो ओपनिङ गरेको अनुमान छ ।

समग्रमा फिल्मले सकारात्मक प्रतिक्रिया प्राप्त गरेको छ । शनिबार ‘बोक्सीको घर’ हेर्न महिला दर्शकको घुइँचो लागेको देखियो । नेपाली समाजको यथार्थ मनोविज्ञान र त्यो सँग जोडिएको महिला संवेदनासँग फिल्मको सम्बन्ध देखिन्छ । ‘बोक्सीको घर’को यो आक्रामक ओपनिङले अब स्टार हैन, स्क्रिप्ट हिरो भन्दैछ भन्ने पुष्टि गर्छ । ‘बोक्सीको घर’लाई सुलक्षण भारतीले निर्देशन गरेका हुन् । केकीले यसमा शीर्ष चरित्र निर्वाह गरेका छन् । सुपला सापकोटा, श्वेच्छा राउत पनि प्रमुख भूमिकामा छन् ।